أبيض وإسود

ومنين أجيب ناس لمعناة الكلام يتلوه
إذا كان الإتنين ماتوا فى الهيام
والحجاب صبح مبينهم يبنوه ..

مسير السحابة تختفى
والأمر ينقضى
أنا عمرى ما كرهتها
ولا حبيتها ..

انا لسة فاكر أول مقابلة
واول موقف فى مشكلة ..

لسة فاكر كلمة مش هسيبك
وإزاى انتى كدة
وأنا مضطر اسيبك
لأنى أنا كدة ..

ولانها مش بتقف على حد
ونقولها ونصبر نفسنا
لأنه أساسا مفيش حد
ومش شايف فاصل فى الجد ..

دة أنا لسة فاكر المعاد يوم الحد
عند البالونة السودا
أنا اسف أنا مستاهلش حد  ..

أنا ع الناحية التانية فاكرها
كل اللمض مطفية ومخلعة
ولمبة واحدة مولعة
وشارع طويل اخدته جرى أقولها
أنا أهو هنا ..

بصيت فى مراية أوضتى فجأة
ألاقى مفيش ولا شعرة
ســــودا
باينى عجزت وطلعلى أتب
بس إزاى دة عيد ميلادى العشرين بكرة
يمكن الغلط فى المراية أو نور اللمض !